رێککه‌وتی 16/4/2013، له‌باره‌گه‌ی ژوور، له‌میانه‌ی دیداری نێوان به‌ڕێزان دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر و، مارتن هیلی به‌رپرسی پاشکۆی ئابووری له‌کونسوڵخانه‌ی ئه‌مه‌ریکا له‌هه‌ولێر، باس له‌ئاماده‌باشییه‌کان بۆ چوونی شاندێکی بازرگانی کوردستان بۆ ئه‌مه‌ریکا و هاتنی شاندێكی بازرگانی ئه‌و وڵاته بۆ هه‌رێم کرا.
له‌سه‌ره‌تای دیداره‌که‌دا، به‌ڕێز دارا جه‌لیل خه‌یات به‌گه‌رمی به‌خێرهێنانی شاندی میوانی کرد و هیوای سه‌رکه‌وتنی بۆ خواستن له‌ئه‌رکه‌کانیاندا.
پاشان به‌ڕێزیان ئاماژه‌ی به‌گرنگی چڕکردنه‌وه‌ی هه‌وڵه‌کانی کونسوڵخانه دا له‌روونکره‌دنه‌وه‌ی ره‌وشی پێشکه‌وتووی ئاسایش و ئابووری هه‌رێم بۆ خاوه‌نکارانی ئه‌مه‌ریکا و، هه‌روه‌ها وتی:"کاتی ئه‌وه هاتووه که په‌ڕه‌یه‌کی نوێ له‌بواری بازرگانیدا له‌نێوان هه‌رێمی کوردستان و ویلایه‌ته یه‌کگرتووه‌کانی ئه‌‌مه‌ریکادا هه‌ڵبدرێته‌وه، چونکه ئه‌م کاره زۆر پێویسته بۆ هه‌ردوولامان."
هاوکات دووپاتی له‌سه‌ر ئاماده‌باشی ژوور کرده‌وه به‌مه‌به‌ستی هاریکاریکردنی هه‌ر شاندێکی ئابووری ئه‌مه‌ریکا که بێته کوردستان، چونکه ژوور لای مه‌به‌سته که په‌یوه‌ندییه‌کانی نێوان هه‌ردوولا پته‌وتر بێت، ئه‌ویش له‌پێناو هێنانی مارکه به‌ناوبانگه‌کانی ئه‌مه‌ریکا بۆ کوردستان.
لای خۆیه‌وه، به‌ڕێز مارتن هیلی وێڕای ده‌ربڕینی سوپاسگوزاری خۆیان له‌به‌رامبه‌ر پێشوازی‌لێکردنیاندا، دووپاتی له‌سه‌ر کارکردنیان له‌سه‌ر هێنانی شاندێكی گه‌وره‌ی بازرگانی ئه‌مه‌ریکی بۆ کوردستان کرده‌وه له‌داهاتوودا.
له‌میانه‌ی گفتوگۆکانیاندا، هه‌ردوولا تاوتوێی بابه‌تی رێکخستن و ئاما‌ده‌کردنی شاندێکی بازرگانی هه‌رێمیان کرد، که له‌داهاتوویه‌کی نزیکدا سه‌ردانی ئه‌مه‌ریکا بکات و له‌میانه‌یدا چاویان بکه‌وێت به‌به‌رپرسانی لایه‌نه په‌یوه‌ندیداره‌کانی بواری ئابووری و بازرگانی له‌و وڵاته‌دا.
