رۆژى 27/3/2011 دارا جەلیل خەیات سەرۆکى ژوور پێشوازى کرد لە شاندێکى کۆمپانیاى ئەلقەسوا بۆ بازرگانى خۆراکی کە پێک هاتبوو لە عەبدولحەلیم مەلحەمی بەرێوەبەرى گشتى کۆمپانیا و سەعید عەلى سەرۆکى جێبەجێکارى گوندى نێودەولەتى ولاتى دوبەى.
لە دانیشتنێکدا کە باقى محمد هادی ئەندامى ئەنجوومەنى کارگێرى ژوور ئامادەی بوو شاندى میوان مەبەستى سەردانەکەیان بۆ هەرێمى کوردستان و ژوورى بازرگانى هەولێر ئاشکرا کرد کە نیازیان هەیە بۆ کردنەوەى پێشانگایەکى کاتیی فرۆشتنى راستەوخۆ لە هەولێر لە ژێر سیستەمى گوندى نێودەولەتى لە هەولێر بکەنەوە کە تایبەت دەبێ بە ژمارەیەکى زۆر لە کۆمپانیا و بازرگانانى ولاتانى جیهان بۆ خستنەرووى بەرهەم و فرۆشتنى بە شێوەیەکى راستەوخۆ بە هاولاتیان بۆ ماوەیەکى دیاری کراو کە لەوانەیە 3 مانگ یان زیاتر بخایەنێت، وە ئەم کارەشیان وەک تاقیکردنەوەیەک لە هەرێمى کوردستان بۆ یەکەمین جار ئەنجام دەدەن و ئەگەر سەرکەوتن بەدەست بهێنن لەمەودوا بە بەردەوامى سالانە پێشانگاى لەو بابەتانە لە هەولێر و شارەکانى ترى کوردستان دەکەنەوە.
سەرۆکى ژوور وێراى ئەوەى بیرۆکەى ئەم کارەى بە پەسەندزانى هیواى سەرکەوتنى بۆ خواستن و ئامادەیی خۆى بۆ هاوکاریکردنیان دەربرى.