لە كۆربەندەكەدا كە ژمارەیەكی زۆر لە بازرگان و خاوەنكاری بەریتانی و بیانی و سەرۆكی یەكێتی ژوورەكانی بازرگانی عێراق ئامادەی بوون، باس لە رەوشی وەبەرهێنان و كەرتی نەوت لە عێراق و هەرێمی كوردستان كرا، كۆربەندەكە لە چەند پەنەڵێك پێكهات و لە یەكێك لە پەنەڵەكان دارا جەلیل خەیات سەرۆكی یەكێتی ژوورەكانی بازرگانی و پیشەسازی هەرێمی كوردستان وتەیەكی پێشكەشكرد، تیایدا باسی رەوشی ئابووری هەرێمی كوردستانی بەگشتی و شاری هەولێر بە تایبەتی كرد، هەروەها باسی لە رۆڵی یەكێتی ژوورەكانی بازرگانی و پیشەسازی هەرێمی كوردستان كرد لە یارمەتیدان و هاوكاریكردنی كۆمپانیا بیانییەكان و بەتایبەتیش كۆمپانیاكانی بەریتانیا. دارا جەلیل خەیات گوتی: یەكێتی ژوورەكانی بازرگانی تارادەیەكی زۆر باش توانیویەتی یارمەتی كۆمپانیاكان بدات بۆئەوەی بێنە كوردستان و پرۆژەی ستراتیژی ئەنجام بدەن. هەروەها گوتی: هەر كۆمپانیایەك بیەوێ بێتە هەرێم ئێمە هەموو زانیاری و كارئاسانیەكی بۆ دەكەین بۆئەوەی دەست بە كاری خۆی بكات. لە كۆتایی وتەكەیدا ئامادەیی ژوورەكانی بازرگانی و پیشەسازی هەرێمیشی بۆ هەموو جۆرە هاوكاری و هەماهەنگیەك نیشاندا.

لەو كۆربەندەدا چەندین وتار پێشكەش كران، لەوانەش وتەی هەریەك لە ژوورەكانی هەولێر و سلێمانی و دهۆك.

ئەنجوومەنی كاری عێراقی بەریتانی (IBBC) لەژمارەیەك بازرگانی عێراقی بەریتانی پێكدێ، ئەم رێكخراوە بەردەوام شاندی بازرگانی دەهێنێتە عێراق و كوردستان بەمەبەستی بەهێزكردنی پەیوەندی و زانینی هەلەكانی كارو وەبەرهێنان، هەماهەنگی بەردەوامی لەگەل ژووری بازرگانی هەولێردا هەیە، لە سەرەتای دروستبوونیەوە تا ئێستا چەندین دیدارو كۆبوونەویان بۆ بازرگانان رێكخستووە.