لە رۆژانی 5 و 6ی ئەم مانگە ئەنجوومەنی یەكێتی گشتی ژوورە عەرەبییەكان لە دەوحەی پایتەختی قەتەر خولی 115یەمینی ئەنجوومەنەكەیان ساز كرد، تیایدا دارا جەلیل خەیات جێگری سەرۆكی یەكێتی ژوورە بازرگانی و پیشەسازییەكانی عێراق بە نوێنەرایەتی وڵاتەكەی ئامادە بوو.
لەمبارەیەوە دارا جەلیل خەیات بە رۆژنامەكەمانی راگەیاند كە، كۆنگەرەكە بەناونیشانی (ئابووری عەرەب لەنێو بەرەنگارییەكانی قۆناغی نوێ و ئاستەنگە رەگداكوتاوەكان) بوو، تیایدا سەرۆك و نوێنەرانی ژوورە بازرگانی و پیشەسازی و كشتوكاڵییەكانی وڵاتانی عەرەبی هەروەها نوێنەرانی وەزارەت و رێكخراوە ئابوورییەكانی عەرەبی و كۆمكاری عەرەبی بەشدار بوون.
هەروەها وتیشی: لە كۆنگرەكەدا چەندین پرس و بابەتی و كێشەی ئابووری تایبەت بە وڵاتانی عەرەبی تاوتوێ كران، هەروەها پرۆژەی ئەنجومەنەكە بۆ ساڵی 2014 گفتوگۆی لەبارەوە كرا.
ئەمەو لەسەر داوای دارا جەلیل خەیات، ئەنجومەنەكە بڕیاریدا خولی 116یەمینی ئەنجوومەنەكە لەشاری هەولێر لە بەهاری 2014 بەڕێوە بچێت.
لە پەراوێزی ئەو كۆنگرەیەدا دارا جەلیل خەیات بەشداری كرد لە ئاهەنگی تێپەڕبوونی پەنجا ساڵ بەسەر دامەزراندنی ژووری بازرگانی قەتەر، كە بەچاودێری میر شێخ تەمیم بن حەمەد میری دەوڵەتی قەتەڕ بەڕێوەچوو.
