رۆژی 12/12/2016 د. دارا جەلیل خەیات سەرۆكی ژوور پێشوازی لە خاتوو بەیان سامی عەبدولرەحمان نوێنەری حكومەتی هەرێمی كوردستان لە ویلایەتە یەكگرتووەكانی ئەمریكا و شاندی یاوەری كرد.
لە دیدارێكدا كە ژمارەیەك لە ئەندامانی ئەنجومەنی كارگێڕی ژوور ئامادە بوون تێیدا پتەو كردنی پەیوەندییە بازرگانی و ئابووری یەكانی نێوان هەرێمی كوردستان و ئەمریكا وە بەردەوام بوونی ئەم پەیوەندییە جەختی لەسەر كرایەوە.
وە هەردوولا جەختیان لەسەر دانانی پرۆگرامێكی پتەو بۆ ساڵی نوێ دووپات كردەوە بۆ ئەنجامدانی كۆنفڕانسێكی هاوبەش لە نێوان كۆمپانیا ئەمریكیەكان و كوردستانیەكان.
رۆژی 12/12/2016 د. دارا جەلیل خەیات سەرۆكی ژوور پێشوازی لە ئیریك بلتیر راوێژكاری بازرگانی لە باڵیۆزخانەی كەنەدا لە عێراق كرد.
لە دیدارێكدا پتەوكردنی پەیوەندییە بازرگانیەكانی نێوان هەرێمی كوردستان و كەنەدا گفتوگۆی لەسەر كرا، وە بەستنی پەیوەندی و واژوو كردنی یاداشتنامەی لێكتێگەیشتن لە نێوان ژوورە بازرگانیەكانی هەرێم و ژوورە بازرگانیەكانی كەنەدا تەوەرێكی تری ئەم كۆبوونەوەیە بوو.
ئیریك بلتیر رایگەیاند: ئەوان وەكو باڵیۆزخانەی كەنەدا لە عێراق لە ئێستادا لە شاری بەغدا گشت كاروبارەكان بەڕێوە دەبەن ئامانجی سەردانەكەشم بۆ هەرێم دروست كردنی پەیوەندی بازرگانی یە لە نێوان هەرێمی كوردستان و كەنەدا، هەروەها هێنانی كۆمپانیا كەنەدییەكان لە سێكتەرە جیاوازەكان بۆ هەرێمی كوردستان بۆ ئەوەی بەشدار بن لە بازاڕەكانی هەرێمی كوردستان.
وتیشی: وەكو هەنگاوی یەكەممان ئاشناكردنی كۆمپانیا كەنەدییەكانە بە بارودۆخی ئارامی و گونجاوی هەرێم و دواتر هێنانی كۆمپانیا كەنەدییەكان بۆ هەرێمی كوردستان، لێرەوە گشت كاروبارەكان لێرەوە بۆ هەموو شارەكانی عێراق ئەنجام دەدەین.
بلتیر ئەوەشی خستە روو كە بەم نزیكانە زانكۆیەكی كەنەدی بە گشت بەشەكانیەوە لە شاری هەولێر دەكرێتەوە.
لە لایەن خۆیەوە سەرۆكی ژوور دەست خۆشی لە هەوڵ و كۆششەكانی كرد وتی: واژووكردنی یاداشتنامەیەكی لێك تێگەیشتن لە نێوان ژوورە بازرگانیەكانی هەردوولا و هێنانی كۆمپانیا كەنەدییەكان بۆ هەرێم و ئەنجامدانی كۆبوونەوە و دانیشتن لەگەڵ كۆمپانیا كوردستانیەكان هەنگاوێكی گرنگە بۆ بەهێزكردنی پەیوەندییە بازرگانیەكان لە نێوان هەردوولا.
د. دارا ئامادەیی ژووری بازرگانی هەولێری نیشاندا بۆ هەموو پاڵپشتی و هاوكارییەك.
بۆ بەشداریكردن لە كۆنفڕانسێكی ئابووری رۆژی 6 -8 /12/2016 شاندێكی فەرمی بازرگانی كە پێك هاتبوون لە ئەندامانی ئەنجومەنی كارگێڕی ژوور سەركەوت حاجی جەمال، عەبدولكەریم مستەفا و سالار قادر سەردانی شاری عەممانی پایتەختی ئەردەنیان كرد.
شاندی ژوور لە رێگەی كونسوڵخانەی وڵاتی ئیتاڵیا لە هەرێم ئەم سەردانەیان ئەنجامدا لەگەڵ گەیشتنیان بۆ وڵاتی ئەردەن لە لایەن باڵیۆزخانەی ئیتاڵیا لە عەممان پێشوازییان لێكرا.
ئەم كۆنفڕانسە بۆ ماوەی 3 رۆژ بەردەوام بوو چەندین بازرگان و كۆمپانیا لەسەر ئاستی عێراق بەشدارییان تێدا كردبوو، ئەم كۆنفڕانسە چەند كەرتێكی جۆراوجۆری ئابووری لە خۆ گرتبوو، لە هەمان كات دا وۆركشۆپێكی تایبەت بە كاری بازرگانی و ئابووری لە عێراق سازكرا.
لەم كۆنفڕانسەدا دانیشتنی B2B لە نێوان كۆمپانیاكان و خاوەن كار و بازرگانان سازكرا، ئەندامانی ئەنجومەنی كارگێڕی ژووریش داوایان لە كۆمپانیاكان كرد كە بێن بۆ كوردستان و بەشداربن لە بازاڕەكانی هەرێم و كاری بازرگانی ئەنجام بدەن.