لە دیدارێكدا شاندی میوان باسیان لە كارو پرۆژە نێودەوڵەتیەكانی مەغریب كرد كە لە ماوەی رابردوو و ئێستادا ئەنجامدراوە هەروەها گرنگترین ئەو پرۆژانەیان باس كرد كە لە ماوەی داهاتوودا جێ بە جێ دەكرێن.

سەبارەت بە بەرهەمەكانی وڵاتی مەغریب سەرۆكی شاندی میوان وتی: ئێمە لە بەرهەمهێنانی فۆسفات و بەرهەمهێنانی سامانی ماسی یەكێكین لە وڵاتە یەكەمینەكان لەم بوارانەدا، جگە لەم بوارانەش لە سێكتەری گەشت و گوزاریش پێشكەوتووین.

ئەلعماری ئەوەشی خستە روو كە وڵاتی مەغریب و هەرێمی كوردستان لە رووی سیاسیەوە پەیوەندییەكی باشیان هەیە بۆیە بە نیازین لە ماوەی داهاتوودا لە رووی ئابووری و بازرگانیەوە پەیوەندییەكانمان لەگەڵ هەرێم پەرە پێبدەین بۆ ئەم مەبەستە لە سەرەتادا ژوورەكانی بازرگانی و پیشەسازی وڵاتی مەغریب داوەتنامەیەكی فەرمی پێشكەش بە ئێوە كردووە بۆ ئەوەی سەردانمان بكەن و پەیوەندی لە نێوان ژوورە بازرگانیەكان دروست بكەین.

وتیشی: بە نیازین لە ئایندەیەكی نزیكدا نوسینگەی دیبلۆماتی وڵاتی مەغریب لە شاری هەولێر دەكەینەوە كە ئەمەش رێگا خۆشكەر دەبێت بۆ گۆرینەوە و زیاتر پێشخستنی پەیوەندییەكانمان لەگەڵ هەرێم و پێدانی ڤیزا ئاسانتر دەبێت.

لە لایەن خۆیەوە ئیبراهیم سۆفی وێڕای بەخێرهێنان دەست خۆشی ئەم هەنگاوەی لێكردن و بە سەرەتاییەكی باشی پتەوكردنی پەیوەندییەكانی نێوان هەردوولای ناوبرد.

لە هەمان كاتیشدا كورتە باسێكی لەسەر شاری هەولێر بۆ شاندی میوان باسكرد و وتی: لە ئێستادا شاری هەولێر بە دەرگایەكی ئابووری دادەنرێت بۆ هەموو عێراق و دەتوانن كۆمپانیا مەغریبیەكان لە شاری هەولێرەوە بەرهەمەكانیان بۆ هەموو عێراق هەناردە بكەن و وەبەرهێنان ئەنجام بدەن و بەشداربن لە ئاوەدانكردنەوەی هەرێم.

هەروەها ئەوەشی خستە روو كە وڵاتی مەغریب دەتوانێت هاوشێوەی چەندین وڵات لە شاری هەولێر پێشانگای تایبەت بە بەرهەمەكانی خۆیان بكەنەوە بۆ ئەوەی بازرگانان و خاوەن كۆمپانیا كوردستانیەكان لە نزیكەوە ئاشنا بن بە بەرهەمەكانتان.