ئەم كۆنفڕانسە لە 9-10/10/2016 لە هۆڵی شەهید سەعد عەبدوڵڵا لە هەولێر بە بەشداری ژمارەیەك لە شارەزا و پسپۆڕی كوردستانی، عێراقی، هەرێمی و ئەوروپی بەرێوە دەچێت، لە ماوەی ئەو دوو رۆژەدا 6 پەنەڵ گفتوگۆی لەسەر دەكەن كە بریتین لە :

 1- هاوبەشكاری كەرتی گشتی و تایبەت لە پەرەپێدانی ئابووری

2- بەڕێوەبردنی تەنگژەی ئابووری

3- ژینگەی كار و وەبەرهێنان لە كوردستان

4- فێركردن راهێنانی پیشەیی بۆ پەرەپێدانی كەرتی تایبەت

5-  لە دوای نەوت، پەرەپێدانی ئابووری جێگرەوە

6- گەشەكردنی كەرتی تایبەت لە فێركردنی باڵا

 

لەم كۆنفڕانسەدا گفتوگۆی تێروتەسەل دەربارەی هەریەك لەو پەنەڵانە بكرێت و بابەتی گرنگ و هەستیار كە خزمەت بە رەوشی ئابووری هەرێم دەكات دەوروژێنیرێ‌، بە هەمان شێوەی كۆنفڕانسە ئابووریەكان ، ئەم كۆنفڕانسەش دەرئەنجامی دەبێت و بە ئامادەكردنی راسپاردە بۆ باشتر كردنی رەوشی ئابووری هەرێمی كوردستان كۆتایی دێت.

وا چاوەڕوان دەكرێت دەقی ئەو راسپاردانە بكرێت بە راپۆرتێك و پێشكەش بە حكومەتی هەرێم بكرێت بۆ ئەوەی لە دارشتنی نەخشەو پلانەكانی داهاتوو لەبەر چاو بگیرێن، پێویستە بەشداربووانی كۆنفڕانس كە پێشوەختە داوەت كراون ئامادەكاری بكەن بۆ بەشداری كردن لە گفتوگۆكانی پەنەڵەكان و بە سەرنج و پێشنیارەكانیان نوسینەوەی راسپاردەكان دەوڵەمەندتر بكەن لە پێناو گەیشتن بە چارەسەرێكی گونجاو بۆ ئەو قەیرانە ئابووری و داراییەی كە هەرێمی كوردستانی تێكەوتووە.