رۆژی 21/10/2015 د. دارا جەلیل خەیات سەرۆكی ژووری بازرگانی و پیشەسازی هەولێر پێشوازی لە گێرت مێنێك باڵیۆزی دانمارك لە عێراق كرد.
لە دیدارێكدا كە ژمارەیەك لە ئەندامانی ئەنجومەنی كارگێڕی ژوور ئامادە بوون باس لە پتەوكردنی پەیوەندییە ئابووری و بازرگانیەكانی نێوان دانمارك و هەرێمی كوردستان كرا.
باڵیۆزی دانمارك رایگەیاند: وەبەرهێنەران و خاوەن كۆمپانیاكانی ئەوروپا بۆ كاركردن لە دوای بازاڕێكی فراوان دەگەڕێن و سەیری دۆخی ئەمنی و ئارامی ئەو شوێنە دەكەن بۆ ئەوەی كە بڕیار بدەن وەبەرهێنان بكەن.
ووتیشی: بڕیاری پێشخستنی ئابووری رۆڵێكی باڵای هەیە شان بە شانی هەر بڕیارێكی سیاسی.
سەرۆكی ژوور هیوای خواست كە كۆمپانیا دانماركیەكانیش بتوانن روو لە هەرێم بكەن و شان بەشانی كۆمپانیاكانی تری وڵاتە ئەوروپیەكان بتوانن وەبەرهێنان بكەن و لقی خۆیان بكەنەوە.
وتیشی دۆخی سیاسی و ئەمنی هەرێمی كوردستان زۆر ئارامە و ئەم قەیرانیە داراییەش كاتی یە و لە داهاتوویەكی كەم چارەسەر دەبێت ، ئەوەشی خستە روو كە جگە لە سێكتەری نەوت ئێستا حكومەتی هەرێمی كوردستان پەرە بە سێكتەرەكانی تریش دەدات.
رۆژی 21/10/2015 د. دارا جەلیل خەیات پێشوازی لە شاندێكی گروپی كۆمپانیاكانی لایكۆ بە سەرۆكایەتی مایكل پاریدس بەڕێوبەری گشتی كۆمپانیاكە كرد.
لە دیدارێكد كە هەریەكە سەدرەددین كەمال و باقی محەممەد هادی ئەندامانی ئەنجومەنی كارگێڕی ژوور ئامادەی بوون شاندی میوان باسیان لە كار و پرۆژەكانی خۆیان كرد كە لە بواری دروستكردن و هەناردە و هاوردە كردنی بەرهەمە خۆراكی و خواردەمەنیەكان كار دەكەن، %60ی وڵاتی قوبڕس لەم سێكتەرە دابین دەكەن.
مایكل پاریدس رایگەیاند: كۆمپانیاكەیان ماوەی 55 ساڵە دامەزراوە شان بەشانی بەرهەم هێنان لە بواری گواستنەوە و هەناردە و هاوردەكردنی بەرهەمە خۆراك و خواردەمەنیەكان كار دەكەن.
ئامانجی سەردانی شاندی كۆمپانیایەكەیان بۆ هەرێم سەیركردنی بازاڕە بۆ ئەوەی بتوانن بەرهەمەكانیان هەناردەی كوردستان بكەن و بتوانن شان بە شانی كۆمپانیاكانی تر خزمەتی هەرێم بكەن.
لای خۆشیەوە سەرۆكی ژوور رایگەیاند: كە دەرگای هەرێمی كوردستان واڵایە بۆ هەر لایەنێك كە بیەوێت كار بكات، راستی قسەكانیشمان بوونی چەندین كۆمپانیای بیانیە لە هەرێم.
ئەوەشی خستە روو كە ئێستا هەرێمی كوردستان %90ی كەل و پەل لە دەرەوە هاوردە دەكات ئەمەش بوار بۆ سەركەوتنی كارەكەتان لە هەرێم دەرەخسێنێت.
لە كۆتاییشدا سەرۆكی ژوور ئامادەیی ژووری بازرگانی و پیشەسازی هەولێری نیشاندا بۆ هەموو هاوكارییەك.
رۆژی 20/10/2015 د. دارا جەلیل خەیات سەرۆكی ژووری بازرگانی و پیشەسازی هەولێر بە ئامادەبوونی بەشێك لە ئەندامانی ئەنجومەنی كارگێڕی ژوور پێشوازییان لە كارمێلۆ فیگارا قونسوڵی گشتی ئیتاڵیا لە هەرێمی كوردستان كرد.
دوای بەخێرهێنان سەرۆكی ژوور رایگەیاند: پەیوەندی سیاسی و ئابووری نێوان هەرێمی كوردستان و ئیتاڵیا لە ئاستێكی باش دایە هیواخوازین ئەم پەیوەندییە بەردەوام بێت و زیاتر پەرەی پێ بدرێت.
وتیشی: پەیوەندی وڵاتە رۆژئاواییەكان لەگەڵ وڵاتانی ناوچەكە بەرەو ئاستێكی باش دەڕوات كە ئەمەش كاریگەری راستەوخۆی لەسەر پێشخستنی ئابووری و بازرگانی هەیە لە ناوچەكە.
سەرۆكی ژوور داوای لە قونسوڵی ئیتاڵیاش كرد كە هەوڵ بدەن راستەوخۆ لە هەولێرەوە بتوانن ڤیزا دابین بكەن بۆ هاوڵاتیان و بازرگانانی هەرێم.
لە لایەن خۆشیەوە قونسوڵی ئیتاڵیا رایگەیاند: كە لە ئێستادا داواكاری زۆرە لەسەر وەرگرتنی ڤیزا بەڵام ئەوان وەكو باڵیۆزخانە لە بەغداد كار ئاسانی تەواو دەكەن بەتایبەت بۆ بازرگانان.
وتیشی: لە سەرەتای مانگی داهاتوو شاندێكی گەورەی كۆمپانیا ئیتاڵیەكان لە گشت سێكتەرەكان سەردانی ژووری بازرگانی هەولێر دەكەن و بۆ هەلی كار و كۆبوونەوەی B2B لەگەڵ بازرگانانی هەرێم ئەنجام بدەن.
سەرۆكی ژووریش ئامادەیی ژووری بازرگانی هەولێری دەربڕی بۆ هەموو هاوكارییەك و پاڵپشتیەك.
وۆرك شۆپێك لەسەر ئابووری و كار لە هەرێمی كوردستان سازكرا
بە هەماهەنگی ژووری بازرگانی سوید و یەكێتی ژوورەكانی بازرگانی و پیشەسازی هەرێمی كوردستان و بە هاوكاری زانكۆی سەڵاحەددین و پارێزگای هەولێر وە بە ئامادەبوونی سەرۆكی ژووری بازرگانی و پیشەسازی هەولێر و ژمارەیەك لە ئەندامانی ئەنجومەنی كارگێڕی ژوور و قایمقامی هەولێر و جێگری پارێزگاری هەولێر و ژمارەیەك لە مامۆستایان و قوتابیانی زانكۆ رۆژی 19/10/2015 لە هۆڵی كۆنفڕانسی ژووری بازرگانی و پیشەسازی هەولێر وۆرك شۆپێك لەسەر ئابووری و كار لە هەرێمی كوردستان سازكرا.
ئەم وۆرك شۆپە لە لایەن هەریەك لە د. قەیس قاسم رۆژنامەنوسی سەربەخۆ و ئەنتۆن سینێڵ بەڕێوبەری پرۆژەكان لە ژووری بازرگانی رۆژئاوای سوید و سوزان فۆرسبیرگ راوێكار لە ئاراستەكردنی هەلی كار پێشكەشكران.
ئامانجی ئەم وۆرك شۆپە روونكردنەوە و گفتوگۆ كردن بوو لەسەر چۆنیەتی بەدەستهێنانی هەلی كار وە چۆنیتی دروستكردنی CV بەشێوەیەكی پێشكەوتوو وە پەرەپێدانی كار و پرۆژەكان.