تۆ لێرەیت: ErbilChamberبابه‌ت فلته‌ر كراوه‌ به‌پێی به‌روار: سێ شەممە, 10 ئەیلول 2013

رێککه‌وتی 9/9/2013، به‌سه‌رپه‌رشتی ‌‌به‌ڕێز نه‌وزاد هادی پارێزگاری هه‌ولێر و به‌رپرسانی باڵای حکومی و که‌رتی تایبه‌تی هه‌ردوولا، کۆبوونه‌وه‌یه‌کی فراوان له‌نێوان ژماره‌یه‌ک له‌بازرگان و خاوه‌ن کۆمپانیا‌ کوردستانی و بولگارییه‌کان له‌سه‌نته‌ری رۆشنبیری و کۆمه‌ڵایه‌تی ژووری بازرگانی هه‌ولێر به‌ڕێوه‌چوو.   

به‌و بۆنه‌یه‌وه‌، له‌وته‌یه‌كى‌دا به‌ڕێز نه‌وزاد هادی پارێزگاری هه‌ولێر، وتی:"هاتنی شانده‌ بازرگانییه‌کانی وڵاتان بۆ هه‌رێمی کوردستان جێی بایه‌خی حکومه‌تی هه‌رێمه‌، چونکه‌ ستراتیژی حکومه‌ت‌ پاڵپشتیکردن و هاندانی که‌رتی تایبه‌ته‌ له‌هه‌موو که‌رته‌کاندا، به‌تایبه‌تی له‌دروستکردنی په‌یوه‌ندییه بازرگانییه‌کان له‌گه‌ڵ وڵاتانی ده‌ره‌وه‌دا."

هه‌روه‌ها وتی:"بولگاریا وه‌ک وڵاتێکی ئه‌وروپی ئه‌زمونێکی باشیان هه‌یه‌، که‌ رۆڵ ببینێت له‌ دووباره‌ ئاوه‌دانکردنه‌وه‌ی عێراق و کوردستاندا، به‌تایبه‌ت له‌وه‌به‌رهێنان له‌‌بواره جۆراجۆره‌کانی وه‌ک کشتوکاڵ و گه‌شتیاری و ته‌ندروستی‌دا، به‌شێوه‌یه‌ک سوود وقازانجی بۆ هه‌موو لایه‌ک هه‌بێت."

وتیشی:"بازرگانانی کوردستان رۆڵی گرنگ بۆ هه‌موو عێراق و هه‌رێمیش ده‌بینن له‌دروستکردنی په‌یوه‌ندی له‌گه‌ڵ بولگاریادا که‌ له‌کۆتاییدا بۆ به‌رژه‌وه‌ندی گشتی ته‌واو ده‌بێت، بۆیه‌ حکومه‌تی هه‌رێم پاڵپشتی له‌هه‌وڵه‌کانی له‌م جۆره‌ ده‌کات."

دواتر به‌ڕێز خاتوو ئانا یانیڤا جێگری وه‌زیری ئابووری و ووزه‌ و گه‌شتوگوزاری بولگاریا وته‌یه‌کی پێشکه‌ش کرد و تێدا ئاماژه‌ی به‌وه‌دا که‌ بینینی هه‌ولێر وه‌ک یه‌کێک له‌شاره‌ هه‌ره‌ کۆنه‌کانی دونیا خۆشحاڵی کردوون.

هه‌روه‌ها راشیگه‌یاند، که‌ له‌پاش سه‌ردانه‌که‌یان بۆ هه‌ولێر، به‌مه‌به‌ستی پته‌وکردنی په‌یوه‌ندییه‌کان سه‌ردانی هه‌ردوو شاری سلێمانی و دهۆک ده‌که‌ن.

راشیگه‌یاند و وتی:"ئه‌م کۆبوونه‌وه‌یه‌ی ئه‌مڕۆمان زۆر گرنگه‌، چونکه‌ ئێمه‌ باشترین کۆمپانیاکانی وڵاته‌که‌مان له‌گه‌ڵ خۆماندا بۆ کوردستان هێناوه‌، بۆیه‌ دڵنیاین که‌ سه‌ردانه‌که‌مان ئه‌نجامی باشی لێده‌که‌وێته‌وه‌."

دواتر، به‌ڕێز دارا جه‌لیل خه‌یات سه‌رۆکی یه‌کێتی ژووره‌ بازرگانییه‌کانی هه‌رێمی کوردستان، له‌و‌ته‌یه‌کیدا، وێڕای به‌خێرهێنانی شاندی میوان، رایگه‌یاند که‌ وه‌ک ژووری بازرگانی ئاماده‌ن له‌داهاتوودا به‌مه‌به‌ستی په‌ره‌پێدانی په‌یوه‌ندییه‌ بازرگانییه‌کانی نێوان هه‌ردوولا سه‌ردانی وڵاتی  بولگاریا بکه‌ن، تاکو له‌وێ داوه‌تی کۆمپانیا بولگارییه‌کان بکه‌ن که‌ له‌ئاینده‌دا بێنه‌ کوردستان و ده‌ست به‌کاری سه‌رمایه‌گوزاری خۆیان بکه‌ن به‌تایبه‌تی له‌بواره‌کانی گه‌شتیاری و کشتوکاڵی و خزمه‌تگوزارییه گشتییه‌کاندا، هه‌روه‌ها به‌شداری له‌و پێشانگه‌یاند‌ا بکه‌ن که‌ ناوه‌ ناوه‌ له‌ هه‌رێمی کوردستاندا ده‌کرێنه‌وه‌.

به‌ڕێزیان روونیکرده‌وه‌ و باسی له‌وه‌کرد، که‌ سنووری جوگرافی بولگاریا له‌کوردستان نزیکه‌، بۆیه‌ ده‌کرێت له‌رێی وشکانییه‌وه جوڵه‌ی بازرگانی له‌نێوان هه‌ردوولادا ده‌ست پێ بکات‌.

له‌لایه‌کی دیکه‌وه‌، یانچۆ یانیڤ سه‌رۆکی ژووری بازرگانی و پیشه‌سازی خاسکۆڤۆ له‌وته‌یه‌کیدا، وێڕای دووپاتکردنه‌وه‌یان پاڵپشتی له‌قسه‌کانی به‌ڕێز خه‌یات کرد و، وتی:"ماوه‌ی چه‌ند ساڵێکه‌ کۆمپانیا بولگارییه‌کان کاری باشیان له‌ کوردستاندا ئه‌نجام داوه‌، له‌وانیش دروستکردنی به‌ندواێکه‌ له‌سنووری پارێزگه‌ی دهۆک.

هیواشی خواست که‌ شاندێکی ژووری بازرگانی هه‌ولێر سه‌ردانی وڵاته‌که‌ی بکات له‌داهاتوودا، هه‌روه‌ها ئاماژه‌ی به‌وه‌شدا، که‌ ئه‌و کۆمپانیایانه‌ی که‌یاوه‌ریانن بۆ کوردستان، به‌ بڕی سه‌دان ملیۆن دۆلار پڕۆژه‌ی سه‌‌رمایه‌گوزاریان له‌وڵاتانی ئه‌وروپادا هه‌یه.

‌له‌دوای پێشکه‌شکردنی وتاره‌کانیش، خه‌ڵاتی رێزلێنان له‌لایه‌ن سه‌رۆکی شاندی بولگاریا پێشکه‌ش به‌ به‌ڕێز پارێزگاری هه‌ولێر و له‌لایه‌ن به‌ڕێز دارا جه‌لیل خه‌یات سه‌رۆکی ژووری بازرگانیش پێشکه‌ش به‌به‌ڕێز خاتوو ئانا یانیڤا جێگری وه‌زیری ئابووری و ووزه‌ و گه‌شتوگوزاری بولگاریا کران.

جێی ئاماژه‌یه‌، ‌له‌کۆبوونه‌وه‌که‌ هه‌ریه‌ک له‌‌به‌ڕێزان سه‌رۆ دزه‌یی سه‌رۆکی لقی هه‌ولێری یه‌کێتی به‌ڵێنده‌رانی کوردستان و، ژماره‌یه‌ک له‌ئه‌ندامانی ده‌سته‌ی کارگێڕی ژووری بازرگانی هه‌ولێر و، ژماره‌یه‌ک له‌به‌رپرسانی کارگێڕی حکومی بولگاریا و، ژماره‌یه‌ک له‌بازرگان و خاوه‌ن کۆمپانیا لۆکاڵی و بولگارییه‌کان و، میدیاکارانی عێراق و کوردستان ‌ئاماده‌بوون.

شانده‌ بازرگانییه‌که‌ی بولگاریاش که‌ له‌نزیکه‌ی 20 که‌س پێکهاتبوو، ژماره‌یه‌ک نوێنه‌ری کۆمپانیای به‌ناوبانگی تێدا بوو، که‌ له‌بواری که‌لوپه‌کانی خۆراک و وزه‌ و کشتوکاڵ و چه‌ند بوارێکی دیکه‌دا کار ده‌که‌ن.   ‌

بڵاوكراوه‌ته‌وه‌ له‌ هه‌واڵ

رێككه‌وتی 8/9/2013، به‌ئاماده‌بوونی به‌ڕێز نه‌وزاد هادی پارێزگاری هه‌ولێر و، سه‌رۆک و هه‌ردوو جێگر و ئه‌ندامانی ده‌سته‌ی کارگێڕی یه‌کێتی ژووره بازرگانییه‌کانی عێراق، دانيشتنى  ژماره‌  37/12ی  کۆبوونه‌وه‌ی خوولى ژووره‌ بازرگانییه‌کانی عێراق به‌ به شدارى  سه‌رۆکى یه‌کێتی وسه‌رجه‌م سه‌رۆک ژووره‌ بازرگانییه‌کانی عێراق و ژماره‌یه‌ک له‌ئه‌ندامانی ده‌سته‌ی کارگێڕی ژووری بازرگانی هه‌ولێر و، ‌میدیاى كوردستانى و ئيَراقى له‌ له‌سه‌نته‌ری رۆشنبیری و کۆمه‌ڵایه‌تی ژووری بازرگانی هه‌ولێر سازکرا.

جێی ئاماژه‌ پێكردنه ، ‌کۆبوونه‌وه‌ی خووليی ژووره‌ بازرگانییه‌کانی عێراق هه‌ر جاره‌و له‌شارێکی عێراق به‌ڕێوه‌ده‌جێت ،له ده ستپێكدا به‌ڕێز دارا جه‌لیل خه‌یات جێگری سه‌رۆکى یه‌کێتی ژووره‌ بازرگانییه‌کانی عێراق ، به‌ناوی  ژوورى‌ بازرگانی  هه‌ولێر به‌خێرهێنانێکی گه‌رمی به‌شداربووان و میوانانی کرد.

پاشان له‌وته‌یه‌کیدا، به‌ڕێز نه‌وزاد هادی پارێزگاری هه‌ولێر، وتی:"جێی شانازییه که‌ ژووره‌کانی بازرگانی عێراق هه‌ولێریان بۆ کۆبوونه‌وه‌که‌ی ئه‌مجاره‌یان هه‌ڵبژاردووه‌."

له‌لایه‌کی دیکه‌وه‌، ئاماژه‌ی به‌گرنگی رۆڵی ژووره‌کانی بازرگانی کرد له‌ بنیاتنانه‌وه‌ی ژێرخانی وڵاتدا و ‌له‌چوارچێوه‌ی عێراقێکی دیموکراسیدا، به‌وه‌ی ده‌کرێت له‌رێیانه‌وه سه‌رمایه‌گوزاران هه‌لی کار بڕه‌خسێنن و سوودیش له‌ئه‌زموونی کوردستان ببینن که‌ به‌سه‌دان هه‌زار هه‌لی کاری له‌که‌رتی تایبه‌ت ره‌خساندووه‌ و به‌وه‌ش بۆته‌ ناوه‌ندێکی گرنگ بۆ چالاکییه‌ بازرگانییه‌کان.

به‌ڕێز نه‌وزاد هادی ئاماژه‌ی به‌وه‌شدا، که‌ بڕیاره‌ له‌ماوه‌ی داهاتوودا وه‌زیرانی گه‌شتیاری عه‌ره‌ب له‌هه‌ولێر کۆببنه‌وه‌، چونکه‌ هه‌ولێر بۆته‌ پایته‌ختی گه‌شتیاری عه‌ره‌بی بۆ ساڵی 2014.

هاوکات ئاماژه‌ی به‌وه‌دا، که‌ ژووره‌کانی بازرگانی هه‌ولێر و سلێمانی و دهۆک رۆڵی گرنگیان له‌پێشکه‌وتنی کوردستاندا بینیوه‌ له‌ماوه‌ی ساڵانی رابردوودا، حکومه‌تی هه‌رێمیش هانده‌ریان بووه‌، له‌هه‌مان کاتدا ئه‌و حکومه‌ته‌ ئاماده‌یه‌ ئاسانکاری بۆ هه‌موو ژووره‌کانی بازرگانی عێراق بکات بۆ سه‌رخستنی کاره‌کانیان.

لای خۆیه‌وه‌، به‌ڕێز جه‌عفه‌ر حه‌مدانی سه‌رۆکی یه‌کێتی ژووره بازرگانیه‌کانی عێراق له‌وته‌یه‌کیدا وێڕای ئاڕاسته‌کردنی سوپاسگوزاری خۆیان بۆ  پارێزگاری هه‌ولێر له‌به‌رامبه‌ر ئاماده‌بوونی له‌‌کۆبوونه‌وه‌کدا ، هه‌روه‌ها سوپاسگوزاریکردنی ژووری بازرگانی هه‌ولێر له‌به‌رامبه‌ر پێشکه‌شکردنی هه‌موو کارئاسانییه‌ک له‌پێناو رێکخستن و سه‌رخستنی کۆبوونه‌وه‌‌که‌، هاته‌ سه‌ر باسی رۆڵی بازرگانانی عێراق له‌بنیاتنانه‌وی عێراقی نوێدا.

هه‌روه‌ها وتیشێ:"ئه‌مڕۆ هاندان و پاڵپشتییه‌کی باشی حکومه‌تی هه‌رێمی کوردستان ده‌بینین بۆ ژووره‌ بازرگانییه‌کانی هه‌ولێر و سلێمانی و دهۆک ، ده‌کرێت ئیداره‌ی پارێزگاکان یارمه‌تده‌رێکی باشی ژووره‌کانی بازرگانی عێراق بن له‌پارێزگاکانیاندا."

هه‌روه‌ها وتیشی که‌‌ ئێستا سه‌رکه‌وتنێکی باش له‌ کارچالاکییه‌کانی ژووره‌ بازرگانیییه‌کانی عێراقدا ده‌بینین، هه‌ڵبه‌ت له‌م پێناوه‌دا ژووره‌کان پێویستیان به‌پاڵپشتییه‌کی باشتری حکومه‌تی به‌غدا هه‌یه، هیواشی خواست که‌ په‌یوه‌ندییه‌کانی نێوان که‌رتی تایبه‌تی عێراق و که‌رتی تایبه‌تی نێدوه‌وڵه‌تی به‌ره‌و پێشتر بچێت ، هه‌روه‌ها خۆشحاڵی خۆشی به‌هه‌ڵبژاردنی هه‌ولێر وه‌ک پا‌یته‌ختی گه‌شتیاری عه‌ره‌بی بۆ ساڵی 2014 ده‌ربڕی.

له‌پاش پێشکه‌شکردنی وتاره‌کانیش خه‌ڵاتی رێزلێنانی یه‌کێتییه‌که‌ پێشکه‌ش به‌‌ پارێزگاری هه‌ولێر کرا.

پاشان، به‌ڕێزان جه‌عفه‌ر حه‌مدانی و دارا جه‌لیل خه‌یات سه‌رۆک و جێگرانی یه‌کێتی ژووره‌ بازرگانییه‌کانی عێراق له‌لێدوانیاندا بۆ ده‌زگاکانی راگه‌یاندن ئاشکرایان کرد، که‌ له‌کۆبوونه‌وه‌که‌دا کۆمه‌ڵێک پرسی په‌یوه‌ست به‌کاری ژووره‌کان تاوتوێ ده‌کرێن، له‌وانیش به‌تایبه‌ت سه‌ردانه‌کانی ئه‌م دواییانه‌ی به‌رپرسانی یه‌کێتییه‌که‌یان بۆ وڵاتانی ده‌ره‌وه‌ و هاوبه‌شی کاری ئابووری له‌گه‌ڵ کۆمپانیا جیهانییه‌کان و که‌رته‌ جۆراجۆره‌کان و به‌شداریکردنیان له‌دیداره ئابوورییه‌کاندا که‌بڕیاره‌ له‌ماوه‌کانی داهاتوودا له‌عێراق گرێ‌بدرێن ، هه‌روه‌ها ئاماژه‌یان به‌وه‌شدا، که‌ له‌کۆبوونه‌وه‌‌که‌دا یاسای نوێ خانه‌نشینی بۆ کارمه‌ندانی که‌رتی تایبه‌ت و پێکهێنانی ئه‌نجومه‌نه‌کانی هاوبه‌ش له‌گه‌ڵ وڵاتانی ده‌ره‌وه‌ و، به‌شداریپێکردنی یه‌کێتییه‌که له‌بڕیاره‌ ئابوورییه‌کانی عێراقدا باسیان لێوه‌ ده‌کرێت.

دواتر، سه‌رۆک و هه‌ردوو جێگری یه‌کێتی ژووره‌کانی بازرگانی و پیشه‌سازی عێراق و سه‌رۆکی ژووره‌ بازرگانییه‌کان به‌شێوه‌ی داخراو ، ده‌ستیان به‌کۆبوونه‌وه‌  کرد و، بۆماوه‌ی چه‌ند کاتژمێریك به‌رده‌وام بوو.

بڵاوكراوه‌ته‌وه‌ له‌ هه‌واڵ

بڵاوکراوه‌کان

ڕۆژنامه‌ی بازرگانی سه‌رده‌م

ڕێبه‌ری ژوور

هه‌واڵی چاوه‌ڕوانكراو

سعر الصرف

به‌های گۆرینه‌وه‌ی دیناری عیراقی به‌ دولاری ئه‌مری...

«
»
« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

نرخی دراو

نرخی دراو

کەشوهەوای هه‌ولێر

ئاگاداری

Copyright © 2012 Erbil Chamber. All Rights Reserved. سه‌ره‌وه‌ ↑