رێککه‌وتی 12/3/2013، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێکی بازرگانی یۆنانی کرد، که‌ له‌ژماره‌یه‌ک نوێنه‌ری کۆمپانیا به‌ناوبانگه‌کانی ئه‌و وڵاته‌ پێکهاتبوون.

له‌سه‌ره‌تای دیداره‌که‌دا، که‌تێدا به‌ڕێزسه‌ربه‌ست زاخۆیی نوێنه‌ری حکومه‌تی هه‌رێمی کوردستان له‌ئه‌سینا ئاماده‌بوو، دارا جه‌لیل خه‌یات سه‌رۆکی ژوور، وێڕای به‌خێرهێنانی شاندی میوان، وتی:"هیوادارین له‌میانه‌ی سه‌ردانه‌که‌تاندا بۆ هه‌ولێر، ئاگاداری ره‌وشی ئابووری هه‌رێم بن به‌شێوه‌یه‌کی گشتی، که‌ له‌سه‌رجه‌م بواره‌کاندا گه‌شه‌‌ی به‌رچاوی کردووه‌، ئه‌مه‌ش تاکو ببێته‌ هانده‌رێک بۆ رووتێکردنی ژماره‌یه‌کی زۆرتری کۆمپانیا یۆنانییه‌کان بۆ کوردستان."    

له‌لایه‌کی دیکه‌وه‌، به‌ڕێز خه‌یات دووپاتی له‌سه‌ر گرنگی گه‌شه‌پێدانی په‌یوه‌ندییه‌ ئابووری و بازرگانییه‌کانی نێوان هه‌رێمی کوردستان و یۆنان کرده‌وه‌ و، هاوکات ئاماده‌یی ژووری به‌مه‌به‌ستی هاریکاریکردنی شاندی میوان خسته‌ روو.

دواتر ئه‌ندامانی شاندی میوان وێڕای ده‌ربڕینی سوپاسگوزاری خۆیان له‌به‌رامبه‌ر پێشوازیکردنیان له‌لا‌یه‌ن سه‌رۆکی ژوور، ئامانجی سه‌ره‌کی سه‌ردانه‌که‌یان بۆ هه‌ولێری پایته‌خت خسته‌ روو، که‌ئه‌ویش ئاماده‌کاریکردنی کۆمپانیاکانیانه‌ به‌مه‌به‌ستی به‌شداریکردنیان له‌و پێشانگه‌ بازرگانییه‌ جۆراجۆرانه‌ی که‌ بڕیاره‌ له‌ماوه‌کانی داهاتوودا له‌ناو‌چه جیاوازه‌کانی کوردستاندا سازبکرێن، هه‌روها کردنه‌وه‌ی لقه‌کانیان له‌کوردستاندا و، پاشانیش ده‌ستپێکردنیان به‌کاری بازرگانی و به‌شداریکردنیان له‌کاری وه‌به‌رهێنان له‌هه‌رێمدا.

جێی ئاماژه‌یه‌، ئه‌و کۆمپانیایانه‌ی که‌له‌رێی نوێنه‌ره‌کانیانه‌وه‌ سه‌ردانی ژووریان کرد، ، ‌له‌بواره‌کانی به‌ڵێنده‌رایه‌تی و گه‌شتیاری و به‌رهه‌مهێنانی بۆڕی نه‌وت و ئاو و ئاوه‌ڕۆ و، چه‌ند بوارێكی دیکه‌دا شاره‌زان.

رێککه‌وتی 12/3/2013، به‌سه‌رپه‌رشتی به‌ڕێزان مه‌جید سدیق ئه‌ندامی ده‌سته‌ی کارگێڕی ژووری بازرگانی و پیشه‌سازی هه‌ولێر و، به‌کر له‌شکری سه‌رۆکی کۆمه‌ڵه‌ی دۆستایه‌تی کوردی – هۆڵه‌ندی، له‌هۆڵی کۆبوونه‌وه‌کانی ژووری بازرگانی و پیشه‌سازی هه‌ولێر، دیدارێکی بازرگانی له‌نێوان ژماره‌یه‌ک له‌خاوه‌نکارانی کوردستان و هۆڵه‌ندا به‌ڕێوه‌چوو.

له‌سه‌ره‌تای دیداره‌که‌دا، به‌ڕێز مه‌جید سدیق ئه‌ندامی ده‌سته‌ی کارگێڕی ژوور وته‌یه‌کی پێشکه‌ش کرد و تێدا به‌ناوی ئه‌ندامانی ده‌سته‌ی کارگێڕی ژوور‌ به‌خێرهێنانی شاندی میوانی کرد و هیوای سه‌رکه‌وتنی بۆ خواستن و، وتی:"هۆڵه‌ندا وڵاتێکی پێشکه‌تووه‌ و، هه‌ولێریش ده‌رگه‌یه‌کی ئابوورییه‌ به‌رووی سه‌رمایه‌گوزارانی بیانی له‌عێراقدا ، بۆیه‌ ده‌کرێت هۆڵه‌ندییه‌کان زیاتر رووی تێ بکه‌ن، چونکه‌ ئێمه‌ له‌زۆر رووه‌وه‌ پێویستیمان به‌هۆڵه‌ندییه‌کان هه‌یه‌ و له‌وانیش کشتوکاڵ و پیشه‌سازی و گواستنه‌وه‌ و بانک."

له‌لا‌یه‌کی دیکه‌وه‌، به‌ڕێزیان تیشکی خسته‌ سه‌ر ئه‌و ئاسانکارییانه‌ی که‌ حکومه‌تی هه‌رێم به‌هۆی یاسای وه‌به‌رهێنانه‌وه‌ بۆ سه‌رمایه‌گوزاری بیانی ده‌کات، ئه‌ویش له‌رێی پێدانی زه‌وی و لێخوشبوونی باج و چه‌ند هاوکارییه‌کی دیکه‌ی زۆر گرنگ."   

هه‌روه‌ها به‌ڕێزیان هیوای خواست که‌ حکومه‌تی هۆڵه‌ندا به‌زووترین کات کونسوڵخانه‌ی وڵاته‌که‌ی له‌هه‌ولێر بکاته‌وه‌ و هاوکات ئاماده‌یی ژووریشی به‌مه‌به‌ستی هاریکاریكردنی شاندی میوان ده‌ربڕی.

هه‌روه‌ها راشیگه‌یاند و، وتی:"ئه‌م سه‌ردانه‌ هه‌لێکه‌ بۆ خاوه‌نکاره‌کانی کوردستان که‌ ده‌توانن له‌ نزیکه‌‌وه‌ په‌یوه‌ندی له‌گه‌ڵ کۆمپانیا هۆڵه‌ندییه‌کان‌دا ببه‌ستن و ئه‌وه‌ش قازانجێکی باشه‌ بۆیان."

لای خۆیه‌وه‌، به‌ڕێز به‌کر له‌شکری له‌وته‌یه‌کیدا، دووپاتی له‌سه‌ر گرنگی هاتنی شانده‌ هۆڵه‌ندییه‌کان بۆ کوردستان کرده‌وه‌ و، هه‌روه‌ها وتیشی:"ئێمه‌ ژووری بازرگانی به‌ماڵی خۆمان ده‌زانین و، هه‌روه‌ها جێی شانازیمانه‌‌ که چه‌ندین جار یاوه‌ری ‌ شانده‌ هۆڵه‌نه‌دییه‌کانمان بۆ ئێره‌ کردووه‌."

هه‌روه‌ها وتی:"ئه‌ندامانی ئه‌م شانده‌ هۆڵه‌ندییه خه‌ڵکی زۆر شیاون بۆ کاری هاوبه‌شی بازرگانی و وه‌به‌رهێنان، هه‌روه‌ها راشیده‌گه‌یه‌نین که‌ شاندێکی دیکه‌ی له‌مجۆره‌ له‌مانگی داهاتوودا سه‌ردانی هه‌ولێر ده‌کات." 

له‌به‌شێکی دیکه‌ی دیداره‌که‌دا، راڵف دیکه‌ر رۆژنامه‌نووسی هۆڵه‌ندی که‌یاوه‌ری شاندی میوان بوو، چه‌ند پرسارێکی ده‌رباره‌ی په‌یوه‌ندییه‌کانی نێوان هه‌رێم و حکومه‌تی ناوه‌ند و،  کاری کۆمپانیا نه‌وتییه‌ بیانییه‌کان و،  ره‌وشی کوردستان خسته‌روو، لای خۆیه‌وه‌ به‌ڕێز مه‌جید سدیق به‌چه‌ند خاڵیکی ئومێد به‌خش سه‌باره‌ت به‌باری ئابووری و داهاتووی هه‌رێمی کوردستان وه‌ڵامی دایه‌وه‌.

پاشان له‌کۆبوونه‌وه‌یه‌کی رووبه‌روودا، نوێنه‌رانی کۆمپانیا لۆکاڵییه‌کان و ئه‌ندامانی شاندی میوان، وێڕای خۆناساندنیان به‌یه‌کتری، بیروڕیان له‌باره‌ی پڕۆژه وکاری هاوبه‌شییان له‌داهاتوودا، ئاڵوگۆڕکرد.

جێی ئاماژه‌یه‌، ئه‌و کۆمپانیا هۆڵه‌ندییانه‌ی که‌ له‌رێی نوێنه‌ره‌کانیانه‌وه‌ به‌شدارییان له‌دیداره‌که‌دا کرد، له‌بواره‌کانی، ده‌سته‌به‌رکردنی ئاوی خواردنه‌وه‌ و ئاوی کشتوکاڵی و، گواستنه‌وه‌ و، چاره‌سه‌رکردن و کارگه‌ی ئاو و، چه‌ند بوارێکی دیکه‌دا، کار ده‌که‌ن.