رێکه‌وتی 29/1/2013، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێکی خاوه‌نکارانی ئه‌سته‌نبول له‌تورکیا کرد، که به‌سه‌رپه‌رشتی ژووری بازرگانی و پیشه‌سازی ئه‌سته‌نبول و به‌سه‌ردانێک هاتوونه‌ته هه‌ولێری پایته‌خت.
له‌سه‌ره‌تای دانیشتنه‌که‌دا، که‌تیایدا به‌ڕێز سۆران ئه‌بوبه‌کر جێگری سه‌رۆکی ژوور ئاماده‌یبوو، به‌ڕێز دارا جه‌لیل خه‌یات سه‌رۆکی ژوور به‌ناوی ئه‌ندامانی ده‌سته‌ی کارگێڕی ژووره‌وه به‌خێرهێنانی شاندی میوانی کرد و وتی:"سه‌ردانی به‌رده‌وامی شانده تورکییه‌کان بۆ کوردستان زیاتر جموجوڵی بازرگانی دوو لایه‌نه‌مان گه‌رموگوڕتر ده‌کات، هه‌ڵبه‌ت له‌مکاره‌دا ژووری بازرگانی هه‌ولێر رۆڵی به‌رچاوی گێڕاوه، بۆیه وه‌ک ژووری بازرگانی ئاماده‌ی هاریکاریکردنیانین."
لای خۆیانه‌وه، ئه‌ندامانی شاندی میوان وێڕای ناساندنی خۆیان و پێگه‌ی کارکردنیان سوپاسگوزاری خۆیانیان له‌به‌رامبه‌ر پێشوازیکردنیان ده‌ربڕی و به‌گشتی خواستی خۆیان به‌مه‌به‌ستی ده‌ستپێکردنیان به‌کاری بازرگانی له‌هه‌رێمدا خسته‌روو و ئاماژه‌یان به‌وه‌دا که‌سه‌ردانه‌که‌یان هه‌نگاوی یه‌که‌میانه بۆ به‌دیهێنانی ئه‌و خواسته‌یان.
له‌لایه‌کی دیکه‌وه، هه‌ردوو به‌ڕێزان دارا جه‌لیل خه‌یات سه‌رۆکی ژوور و سۆران ئه‌بوبه‌کر جێگری سه‌رۆکی ژوور به‌جیا تیشیکیان خسته سه‌ر کاروباره‌کانی کۆمپانیا تورکییه‌کان له‌کوردستان و رۆڵی ئه‌وانیان به‌رز نرخاند، هه‌روه‌ها باسیان له‌پێشوه‌چوونه‌کانی هه‌رێم کرد له‌هه‌موو بواره‌کاندا به‌تایبه‌تی له‌بواری ئابووریدا.
جێی ئاماژه‌یه، شانده‌که له 15 بازرگانی کوتاڵ وپوشاکی‌دوراو و خاوه‌ن کارگه‌ی دوورینی جل وبه‌رگ بوون، که به‌رهه‌مه‌کانیان بۆ زۆر له‌وڵاتانی جیهان هه‌نارده ده‌که‌ن.
له‌کۆتایی دیداره‌که‌شدا، دیاری رێزلێنان له‌لایه‌ن سه‌رۆکی ژوور پێشکه‌ش به‌ئه‌ندامانی شاندی میوان کرا.