ئەنجومەنى ژوور لەگەڵ بازرگانانى جلوبەرگى ئامادەکراو کۆبووەوە ئەنجومەنى ژوورەکەمان رۆژى 1/7 لەگەڵ 150 بازرگانى جلوبەرگى ئامادەکراو کۆبۆوە، بەمەبەستى پتەوکردنى پەیوەندى لە نێوان ژوورو بازرگان و پیشەسازان و خاوەن کۆمپانیاکان. سۆران ئەبوبەکر جێگرى سەرۆکى ژوور لە وتەیەکەدا دواى خستنەڕووى بەشێک لە چالاکییەکانى ژوور لە ماوەى سێ ساڵى رابردوودا، بەرنامەى داهاتووى خزمەتگوزاریەکانى ژوورى بۆ ئامادەبووان ئاشکراکرد، هەروەها سیستمى بازارى ئازادو پشتگیرى حکومەتى هەرێمى لە کەرتى تایبەت بە بڕبڕەى پشتى پێشکەوتن و گۆڕان لە قەڵەمدا، دواتر باسى لە پرۆسەى هەڵبژاردن کردو گرنگى بەشداریکردنى لەو پرۆسەیەدا شیکردەوەو، داواى لە بازرگانان کرد کە بەشداریکردنێکى بەرچاویان هەبێ لەو پرۆسەیەدا چونکە پەیوەندى بە ئایندەمانەوە هەیە. لەپاشان ئامادەبوان سەرنج و پرسیارو تێبینى خۆیان خستەڕوو.