رۆژی 8/2/2018 بە ئامادەبوونی د. دارا جەلیل خەیات سەرۆكی یەكێتیی ژوورەكانی بازرگانی و پیشەسازی هەرێمی كوردستان، سیروان محەممەد و ئەیاد حەسەن جێگرانی سەرۆكی یەكێتیی ژوورەكان بە بەشداری عوسمان شوانی سكرتێری ئەنجومەنی باڵای ئابووری لە ئەنجومەنی وەزیرانی حكومەتی هەرێمی كوردستان، عەبدوڵڵا ئاكرەیی بەرپرسی پەیوەندییەكانی نێوان هەرێمی كوردستان و ئێران و رێزان جەودەت لە ئەنجومەنی باڵای ئابووری و ژمارەیەك لە ئەندامانی ئەنجومەنی كارگێڕی ژووری بازرگانی و پیشەسازی هەولێر كۆبوونەوەیەكی فراوان لە ژوور بەڕێوەچوو.

كۆبوونەوەكە سێ تەوەری سەرەكی لە خۆ گرتبوو، تەوەری یەكەم باسی پتەوكردنی پەیوەندییە ئابووری و بازرگانیەكان كرا لەگەڵ وڵاتان، بەتایبەتی هەردوو وڵاتی دراوسێ (ئێران و توركیا)، گرنگترین ئەو رێكارانەش باس كرا كە بەهۆیەوە بتوانرێت پەرە بەو پەویەندییانە بدرێت.

تەوەری دووەم بریتی بوو لە دۆزینەوەی رێگاكان بۆ جوڵاندنی بازاڕی هەرێمی كوردستان بە تایەبت لەم بارودۆخە نالەبارە داراییەی ئێستا.

تەوەری سێ یەم گرنگی بدرێت بە دیراسە و لێكۆڵینەوە لەسەر پرۆژە پیشەسازییەكان و كارگەكان.

هەر لەو كۆبوونەوەیە باس لە پەرەپێدانی سێكتەرەكانی كشتوكاڵ و گەشتیاری كرا لە هەرێمی كوردستان.

 

رۆژانی 3-4/2/2018 د. دارا جەلیل خەیات جێگری سەرۆكی یەكێتی ژوورەكانی بازرگانی عێراق لە شاری قاهیرەی پایتەختی وڵاتی میسر و لە ژێر چاودێری عەبدولفەتاح سیسی سەرۆك كۆماری میسر و بەبەشداری سەرۆكی یەكێتی ژوورەكانی وڵاتی عەرەبی سێیەم كۆربەندی وەبەرهێنانی میسر سازكرا.       

لە رۆژی یەكەمی كۆڕبەندەكە دوای وتەی بەخێرهێنان پەنەڵێك لە ژێر ناونیشانی دۆخێكی نوێ بۆ وەبەرهێنان باس لە یاساكانی وەبەرهێنان لە میسر و ئاڕاستەكردنی وەبەرهێنەران لە گشت وڵاتانی جیهان بۆ وڵاتی میسر و دوارۆژی سێكتەرەكانی ئابووری لە میسر و چیرۆكی سەركەوتنی وەبەرهێنەرانی عەرەبی و بیانی لە وڵاتی میسر كرا، پاشان گەشتێك رێكخرا بۆ ئەو پێشانگایانەی كە بەشێك لە بەشداربووان سازیان كردبوو.

لە رۆژی دووەمدا 4 پەنێلی تر بەڕێوەچوو، لە پەنێلی یەكەمدا باس لە هەلی وەبەرهێنان لە پرۆژە گەورەكان و ژێر خانی ئابووری وڵاتی میسر كرا.

لە پەنێلی دووەمدا باس لە چۆنیەتی پێشخستنی سەنتەرەكانی راهێنان كرا لە وڵاتی میسر.

لە پەنێلی سێ یەم تیشك خرایە سەر وەبەرهێنان لە كەرتەكانی نەوت، غاز و كارەبا.

لە پەنێلی چوارەم باس لە پەیوەندییەكانی نێوان وڵاتانی میسر و وڵاتانی عەرەبی، ئەفریقی و ئەوروپی كرا.

لە كۆتایی رۆژی دووەمدا تیشك خرایە سەر  رۆڵی بانكەكان و دامەزراوە پاڵپشتیەكان لە پێشخستنی كەرتەكانی بازرگانی و پیشەسازی وڵاتی میسر.

د. دارا جەلیل خەیات لەم كۆڕبەندە بە جیا لەگەڵ هەریەكە لە رەفعەت هیسار جیلكی ئۆغلو سەرۆكی ژووری بازرگانی توركی، عەلی سنیان غانم سەرۆكی ژووری بازرگانی كوێت، عیسا موراد سەرۆكی ژووری بازرگانی عەمان و سەرۆكی ژووری بازرگانی عەرەبی – بەرازیلی بیرو راكانیان دەربارەی رەوشی بازرگانی ناوچەكە ئاڵوگۆڕ كرد.

لە پەراوێزی ئەم كۆڕبەندە یەكێتی ژوورەكانی بازرگانی عەرەبی دانیشتنی ئاسایی ژمارە 126ی خۆی سازكرد، كە تیشك خرایە سەر دوایین رەوشی بازرگانی ناوچەكە و پتەوكردنی پەیوەندییە بازرگانیەكانی نێوان وڵاتانی عەرەبی.