رۆژى هەینى 15/5/2009 بە ئامادەبوونى دارا جەلیل خەیات سەرۆکى ژوور و ئیبراهیم سۆفى جێگرى یەکەمى سەرۆک و سۆران ئەبوبەکر جێگرى دووەمى سەرۆک و ژمارەیەک لە ئەندامانى ئەنجوومەنى کارگێرى ژوور و چەندین بازرگان و پیشەساز و خاوەن کۆمپانیا لە هەولێر کۆبونەوەیەکى فراوان بۆ (تۆندۆرێنزۆ) ى سەرۆکى هەرێمى فریۆلى ڤینیسا ى ئیتالى و شاندى یاوەرى کە (18) خاوەن یا نوێنەرى کۆمپانیاى ئیتالى لە خۆدەگرت رێکخرا. دارا جەلیل خەیات وێراى بەخێرهێنانى شاندى میوان خۆشحالیخۆى دەربرى و داواى لێکردن کە بەشدارى لە پرۆسەى ئاوەدانکردنەوەى کوردستان بکەن و ئاماژەى بە پشتگیرى کردنى ماددى ئیتالیا لە بەرنامەى پێشخستنى تواناى مرۆیى لە بوارى پیشەسازیدا کرد کە لە رێگەى رێکخراوى یونیدۆ دەگاتە هەرێم و خولى راهێنان بۆ پێشەنگانى کار دەکرێتەوە ، وە ئاماژەى بە ئارەزووى خەلکى کوردستان کرد لە بەکارهێنانى تەکنەلۆجیاى ئیتالى لە پرۆسەى وەبەرهێنان و پیشەسازیدا و ووتى کوردستان برێکى زۆرى لە ئامێرى ئیتالى هەیە کە ماوەیەکى زۆر لە کوردستان کاریان پێ دەکرێت و پێویستیان بە کەل و پەلى یەدەگ هەیە، وە خەلکى کوردستان تاقیکردنەوەیان لەگەل ئەو ئامێرانەدا زۆرە و پەسندیان دەکەن بۆیە پێویستە هەول بدرێ پەیوەندى کوردستان و ئیتالیا لەو بوارانەدا پەرەى پێ بدرێ. سەرۆکى هەرێمى فریۆلى ڤینیساى ئیتالى خۆشحالیخۆى بە بینینى کوردستان دەربرى و لەیەک چوونى ئالاى کوردستان و ئیتالیاى وەک هێمایەکى لەیەکتر نزیکى سۆز و بیرکردنەوەى گەلى ئیتالیا و کوردستان وەسف کرد، ئامادەی خۆى دەربرى بۆ هاندانى کۆمپانیا ئیتالیەکان بۆ بەشداریکردن لە پرۆسەى ئاوەدانکردنەوەى کوردستان و ئاماژەى بە بەشدارى ژمارەیەکى زۆرى کۆمپانیاى ئیتالى لە پێشانگایەکى تایبەت بە بەرهەمى ئیتالیدا کرد کە لە هەولێر دەکرێتەوە هیواى خواست کە ببێتە هۆکارێک بۆ دروستبوونى پەیوەندى زیاتر و هەلسانى کۆمپانیا ئیتالیەکان بە سەرمایەگوزارى کردن لە کوردستان.

رۆژى سێشەممە 18/5/2009 ابراهیم سۆفى جێگرى یەکەمى سەرۆکى ژوور و ژمارەیەک لە ئەندامانى ئەنجوومەنى کارگێرى بەشداریان لە مەراسیمى کردنەوەى چوارەمین پێشانگاى پسپۆرى ئێرانى کرد کە بە ئامادەبوونى نوزاد هادى پارێزگارى هەولێر و جێگرى پارێزگارى ورمێ و چەندین بەرپرسى حکومى ئێرانى و قونسولى ئێرانى و ژمارەیەک لە نوێنەرانى دەزگا حزبى و حکومى و مەدەنى و پیشەیى و جەماوەرێکى زۆر لە گۆرەپانى پێشانگاکان لە هەولێر بەرێوەچوو، باقى محمد هادى لە وتەیەکدا کە بە نوێنەرایەتى ژوورى بازرگان و پیشەسازى هەولێر خوێندیەوە باسى لە گرنگى کردنەوەى پێشانگاکە و هەولى بەردەوامى حکومەت و ژوورى بازرگانى بۆ کردنەوەى ئەم جۆرە پێشانگایانە کرد و ئاماژەى بە بەرەوپێشچوونى پەیوەندى نێوان هەرێم و کۆمارى ئیسلامى ئێران کرد و دەستخۆشى کردنەوەى پێشانگاکەى لە رێکخەرانى کرد. دواتر بە تێکرایى سەرجەم بەشەکانى پێشانگاکە بەسەرکرایەوە. وە بۆ زیاتر رێزلێنان لە شاندى میوان و کۆمپانیا بەشداربووەکان، ئێوارەى هەمان رۆژ لە هوتێلى هەورامان میواندارى کران. رۆژى دواتریش بە ئامادەبوونى تاهر عبدالله جێگرى پارێزگارى هەولێر بۆ شاندى میوان کۆبونەوەیەکى فراوان سازکرا تیایدا باس لە پەیوەندیەکانى نێوان هەرێم و کۆماری ئیسلامى ئێران کرا و هەولەکانى هەردوولا بۆ چارەسەرکردنى گرفتى هاتووچۆکردنى ئۆتۆمبیلى تایبەت و لۆرى بارهەلگرى هەردوولا بۆ ئەم دیو و ئەو دیوى سنور خرایە بەرباس و ئەو پێشڤەچوونانەى کە هاتوونەتە دى لە دەروازەى حاجى ئۆمەران دواى بە فەرمیکردنى ئاماژەى پێدراو هەولى بەردەوامى هەردوولا بۆ کەمکردنەوەى بەربەست لەبەردەم کارى بازرگانیدا لە لایەن هەردوولا جەختى لەسەر کرایەوە.